Bakı şəhər ümumtəhsil məktəbləri və məktəbdənkənar təhsil müəssisələrində general Cəmşid Naxçıvanskinin 160 illik yubileyi ilə əlaqədar silsilə tədbirlər keçirilib.
Belə ki, görkəmli sərkərdə Cəmşid Naxçıvanskinin həyat və fəaliyyəti ilə bağlı ədəbi-bədii gecə və “dəyirmi masa”lar, konfranslar keçirilib, Cəmşid Naxçıvanski adına hərbi liseyə məktəblilərin ekskursiyası təşkil olunub, generalın həyat və fəaliyyəti barədə sərgi, guşə və fotostendlər hazırlanıb.
Tədbirlərdə Cəmşid Naxçıvanskinin diviziya komandiri və pedaqoq kimi müxtəlif illərdə dərc etdirdiyi məqalələrindən parçalar oxunub, “Əsrin qəhrəmanlığı” və “Sərkərdə” adlı sənədli filmlərdən fraqmentlər nümayiş etdirilib.
Təşkil olunan konfranslarda “General-mayor Cəmşid Naxçıvanskinin həyatı və fəaliyyəti (1895-1917-ci illər)”, “Ümummilli lider Heydər Əliyev və Cəmşid Naxçıvanski”, “Cəmşid Naxçıvanskinin Azərbaycan Xalq Cümhuriyyəti dövründə fəaliyyəti və erməni daşnaklarına qarşı mübarizəsi”, “Cəmşid Naxçıvanskinin sovet hakimiyyəti illərində ordu quruculuğu və hərbi kadrların hazırlanması sahəsində fəaliyyəti” mövzularında məruzələr edilib.
Cəmşid Naxçıvanski adına Hərbi liseyin nəzdində yaradılmış muzey və “Azərbaycan Hərb Tarixi Muzeyi”ndə təşkil olunan tədbirlərdə məktəblilərin iştirakı təmin olunub.
Yaradılan guşə, sərgi və fotostendlərdə Cəmşid Naxçıvanskinin həyatının müxtəlif dövrlərinə aid fotoşəkillər, portretlər, onun hərb sənəti sahəsində işləyib hazırladığı sənədlər, yazdığı məqalələr, təltif olunduğu orden və medalların şəkilləri, istedadlı hərb xadiminin döyüş yoluna həsr olunmuş kitablar, qəzet və jurnal materialları nümayiş etdirilib.
Şagirdlər hazırladıqları ədəbi-bədii gecələrdə vətənpərvərlik mövzusunda şeirlər, mahnılar ifa ediblər.
Görkəmli sərkərdənin 160 illik yubileyi ilə bağlı ümumtəhsil məktəblərində yuxarı sinif şagirdlərinin iştirakı ilə hərbi yürüşlər keçirilib, gənclərin çağırışaqədərki hazırlıq dərslərində yarışlar təşkil edilib.