Bakı Şəhəri üzrə Təhsil İdarəsinin tabeliyində faəliyyət göstərən 46 nömrəli Məktəbdənkənar Tərbiyə İşi Mərkəzində “Yol nişanları əlifbasını birlikdə öyrənək!”, “Yol hərəkəti qaydaları və mən” devizi altında maarifləndirici tədbirlər təşkil edilmişdir. Tədbirlərdə Azərbaycan Respublikası DİN Baş DYP İdarəsinin əməkdaşı polis polkovnik leytenantı Deystani İsa, Bakı şəhər DYP İdarəsinin polis polkovniki Vaqif Əsədov, polis leytenantı Vüsal Nağıyev, Bakı şəhəri 21,31, 32, 42, 96, 126, 144, 151, 157, 283 nömrəli tam orta məktəblərin şagirdləri və Mərkəzin dərnək üzvləri iştirak etmişlər.
Tədbirlərdə şagirdlərin mövzuya uyğun çəkdikləri rəsmlər, divar qəzetləri, əl işləri sərgilənmiş, ən yaxşı işlər polis əməkdaşları və müəllimlər tərəfindən seçilərək qiymətləndirilmişdir.
“Svetofor”, “Sürücü”, “Polismen”, “Yol nişanları”, “Sərnişin”, “Velosipedçilər”, “Piyadalar”, “Küçə, yol, yolayrıcı” mövzularını əhatə edən məşğələlər interaktiv üsullarla və müasir texnologiyalarla təşkil olunmuşdur. Hər bir komanda mövzuya uyğun təqdimat hazırlamışdır.
Tədbirdə iştirak edən qonaqlar komandaların çıxışlarına münasibət bildirmiş və qiymətləndirilmişdir. Komandalara bölünmüş uşaqlar yol hərəkəti qaydaları ilə bağlı səhnəciklər göstərmiş, mövzuya uyğun suallara cavab vermişlər.
Yol hərəkəti qaydalarını məktəblilər arasında təbliğ etmək məqsədilə keçirilən maarifləndirici tədbirlərdə polis əməkdaşları şagirdlərlə təbliğat xarakterli söhbət aparmış, diskussiya keçirmişdir. DYP əməkdaşları uşaqların suallarına cavab vermiş, onları yol hərəkəti qaydalarına düzgün əməl etməyə çağırmışdır.
Bakı şəhəri 46 nömrəli Məktəbdənkənar Tərbiyə İşi Mərkəzinin “Yol polisinin gənc köməkçiləri” komandasının üzvləri yol qaydaları ilə bağlı nəzəri biliklərini təcrübədə də həyata keçirdilər. “Uşaqları yol qəzalarından qoruyaq!” devizi altında keçirilən aksiyada əsas məqsəd yol-nəqliyyat hadisələri ilə bağlı maarifləndirmə işini gücləndirmək, uşaq ölümlərinin sayını azaltmaq, ictimaiyyətin diqqətini bu aktual məsələyə cəlb etməkdir. Aksiyada polis forması geyinmiş uşaqlar müxtəlif plakatlarla sürücüləri yol qaydalarına düzgün əməl etməyə çağırmış, qayda pozan sürücülərə iradlarını bildirmişdilər. “Balaca polislər” Bakı şəhər DYP İdarəsinin polis polkovniki Vaqif Əsədovun nəzarəti ilə yolu təyin olunmamış yerdən keçən piyadaları saxlamış, məsləhətlər vermiş, “Yol Hərəkəti Haqqında” Qanunun tələblərinə uyğun hərəkət etməyi tövsiyə etmişlər.
Qeyd edilən tədbirlərdə fəal iştirak edən uşaqlara sertifikatlar verilmiş, fərqlənən uşaqlara yol hərəkəti qaydalarına aid əyani vəsaitlər paylanılmışdır.