Bakı Şəhəri üzrə Təhsil İdarəsinin tabeliyində fəaliyyət göstərən təhsil müəssisələrində “15 İyun- Milli Qurtuluş Günü” münasibətilə silsilə tədbirlər keçirilir. Belə tədbirlərdən biri də 159 nömrəli tam orta məktəbdə təşkil edilmişdir.
Əvvəlcə məktəbin foyesində şagirdlərin əl işlərindən ibarət sərgi və siniflərin aylıq divar qəzetləri nümayiş etdirilmişdir.
Daha sonra məktəbin şagirdlərinin ifasında ədəbi-bədii kompozisiya göstərilmiş, məktəblilər vətənpərvərlik mövzusunda şeirlər, mahnılar səsləndirmiş, onların ifasında milli ruhda musiqi nömrələri alqışlarla qarşılanmışdır.
Tədbirdə Nəsimi Rayon İcra Hakimiyyətinin başçısı Asif Əsgərov, müavini Gülarə Verdiyeva, Milli Məclisin Deputatı, Nəsimi rayon Yeni Azərbaycan Partiyasının sədri Məlahət İbrahimqızı, Bakı Şəhər Təhsil İdarəsinin əməkdaşı Böyükağa Əhmədov, metodistlər, Nəsimi rayon məktəb direktorları, Həzi Aslanov adına Zabitlər Evinin əməkdaşları və valideynlər iştirak etmişlər.
Tədbir iştirakçılarını əlamətdar gün münasibətilə təbrik edən Nəsimi Rayon İcra Hakimiyyətinin başçısı Asif Əsgərov Ulu Öndər Heydər Əliyev zəkasının şah əsəri olan Azərbaycanın bu gün dünyanın sayılıb seçilən dövlətlərindən biri, harada yaşamasından asılı olmayaraq bütün dünya azərbaycanlılarının qürur mənbəyi olduğunu qeyd etdi.
Tədbirdə “15 iyun- Milli Qurtuluş Günü” ilə bağlı slayd və Ümummilli Lider Heydər Əliyevin həyat və fəaliyyətindən bəhs edən qısametrajlı film nümayiş etdirilmişdir.