Paytaxt məktəbliləri “Olimpiya Hərəkatı - 2019” (Olympic Moves - 2019)  proqramı çərçivəsində təşkil edilən Bakı birinciliyinin final mərhələsində uğurla çıxış ediblər.

Belə ki, final mərhələsinin nəticələrinə əsasən, “Olimpiya Hərəkatı - 2019” proqramının üçüncü mövsümünün I, II və III yerlərini müvafiq olaraq velosiped yarışı üzrə 308, 29, 111 nömrəli tam orta məktəblərin, badminton üzrə 286, 260, 276 nömrəli tam orta məktəblərin, həndbol üzrə isə 183, 12 və 80 nömrəli tam orta məktəblərin komandaları tutublar.

Qalib məktəb komandaları təşkilatçı qurumların kubok, diplom, medal və qiymətli hədiyyələri ilə mükafatlandırılıb.

Qeyd edək ki, noyabr ayından  start götürən proqram idmanın badminton, həndbol və velosiped yarışlarını əhatə edib.

Məktəbdaxili yarışlarda paytaxtın 291 məktəbi üzrə ümumilikdə 13 mindən çox şagirdi iştirak edib. Final mərhələsində hər rayondan müvafiq idman növləri üzrə birinci yeri tutan komandalar mübarizə aparıblar.

Onu da qeyd edək ki, “Olimpiya Hərəkatı-2019” idman proqramı Təhsil Nazirliyi, Milli Olimpiya Komitəsi, Gənclər və İdman Nazirliyinin birgə təşkilatçılığı ilə həyata keçirilir.