Dövlət ümumi təhsil müəssisələrində tədris prosesinin sağlam, təhlükəsiz və əlverişli psixoloji mühitdə təşkil edilməsi, valideynlərdə övladlarının təhsil şəraiti barədə məlumatlılığın və məmnunluğun artırılması, təhsil prosesinin bütün iştirakçıları tərəfindən dövlət təhsil standartlarının tələblərinə əməl olunmasını təmin etmək  məqsədilə 2016-2017-ci tədris ilindən etibarən, Bakı şəhərinin bir sıra ümumi təhsil müəssisələrində “Məktəblinin dostu” pilot layihəsinin icrasına başlanılmışdır.

Təhsil Nazirliyinin “ASAN xidmət”lə birgə reallaşdırdığı ”Məktəblinin dostu” pilot layihəsi çərçivəsində Bakı şəhərindəki 31 ümumi təhsil müəssisəsində ilkin olaraq 122 nəfər  “Məktəblinin dostu” fəaliyyət göstərir.

 “Məktəblinin dostu”nun əsas vəzifələri müəllim və şagirdlər üçün daha təhlükəsiz mühit yaratmaq, ilk tibbi və psixoloji yardım göstərmək, mütəmadi olaraq şagird, valideyn, müəllim, təlim-tərbiyə müəssisələrinin kollektivi və rəhbərliyi ilə maarifləndirmə və diaqnostik işlərin aparılmasıdır. Gələcəkdə layihənin  əhatə dairəsinin genişləndirilməsi nəzərdə tutulur.