Bakı şəhəri ümumtəhsil məktəbləri və məktəbdənkənar təhsil müəssisələrində Respublikada elan olunmuş “Hərəkətin təhlükəsizliyi” aylığı çərçivəsində məktəblilərin təhlükəsizliyinin təmin edilməsi, yol hərəkəti ilə bağlı həyat və sağlamlıqlarının qorunması, uşaq və yeniyetmələrin iştirakı ilə yol-nəqliyyat hadisələrinin qarşısının alınması, təhlükəsiz davranış vərdişlərinin aşılanması məqsədilə ərazi yol polisi əməkdaşları, valideynlər, ictimai qurumların nümayəndələri ilə birlikdə maarifləndirici tədbirlər keçirilib.
Təhsil müəssisələrində “Üç möcüzəli rəng: qırmızı, yaşıl, sarı”, “Yol hərəkəti qaydalarını vurma cədvəli kimi yadında saxla”, “Kim yol hərəkəti qaydalarını yaxşı bilir”, “Yüksək sürət-can alır”, “Stop-dayan yol hərəkəti qaydalarına əməl et”, “Yol nişanlarını tanıyaq”, “Yol hərəkəti qaydalarını öyrənmək həyatımızın təminatıdır”, “İşıqfor məktəbi”, “Yol uşaqların gözü ilə”, “Yol hərəkətinin əlifbası”, “Yol hərəkəti qaydaları ölkəsinə səyahət” və digər adlarla təşkil olunan dəyirmi masalar, disputlar, treninqlər, praktiki məşğələlər, nümunəvi dərslər, izahat xarakterli diskusiyalar, valideynlər üçün məsləhət saatları, səhnəciklər, inşa, rəsm və şeir müsabiqələrində məktəblilərə yol hərəkəti qaydaları haqqında ətraflı məlumat verilib, iştirakçılara kitabçalar, bukletlər və plakatlar paylanıb.
Eyni zamanda Bakı şəhəri 60, 151, 164, 245 nömrəli tam ota məktəblərinin direktor müavinləri və uşaq birliyi rəhbərləri üçün 46 nömrəli Məktəbdənkənar Tərbiyə İşi Mərkəzində “hərəkətin təhlükəsizliyi aylığı” ilə əlaqədar təlimati seminarlar da keçirilib.
Bakı şəhəri 46 nömrəli Məktəbdənkənar Tərbiyə İşi Mərkəzinin müasir təlim kompleksində keçirilən maarifləndirici tədbirlərdə dərnək üzvləri virtual sürücülüklə məşğul olublar. Maarifləndirici tədbirdə uşaqlarla yol hərəkətinə aid viktorina da keçirilib. Həm sürücülük, həm də viktorina üzrə fərqlənən uşaqlar qiymətləndirilib.