Məktəblilərin müxtəlif elm sahələrinə marağını stimullaşdırmaq məqsədilə Azərbaycan Milli Elmlər Akademiyası 70 illik yubiley tədbirləri çərçivəsində Akademiyanın bütün elmi müəssisəsi və təşkilatlarının əldə etdiyi elmi nailiyyət və yeniliklərinin nümayiş olunduğu “Elmi Nailiyyətlər” sərgisinə ekskursiyalar təşkil olunur.
Sərgidə məktəblilərə Akademiyanın sərgiyə qatılan elmi müəssisə və təşkilatları barədə məlumat verilmiş, qurumların hansı sərgi məhsulları ilə çıxış etdiyini, sərgi üzrə təqdim olunan məhsulların növünü, formatını, müxtəlif müəssisələrə məxsus ixtira və eksponatların mövzu dairəsi uşaqların diqqətinə çatdırılmışdır. Qeyd olunmuşdur ki, Akademiyanın yeddi elmi bölməsinin tərkibindəki institut və təşkilatların, regional elmi mərkəz və bölmələrin fəaliyyətini, o cümlədən rəyasət heyətinin guşələrinə qoyulan eksponatları əks etdirən sərgi 38 pavilyondan ibarətdir.
Sərgi zamanı AMEA-nın elmi müəssisə və təşkilatlarında elmin müxtəlif istiqamətlərində həm fundamental, həm də innovativ tətbiqi əhəmiyyəti olan bir sıra nailiyyətlər əldə olunduğu, bu nailiyyətlərin istehsalatın bir çox sahələrində istifadə edilməsi üçün xarici dövlət və qeyri-dövlət müəssisələrinin mütəxəssislərini yeniliklər barədə müntəzəm olaraq məlumatlandırmağın əsas şərt olduğu vurğulanmışdır.
Şagirdlər Akademiyanın institut və təşkilatlarının fəaliyyətindən bəhs edən, Azərbaycan, rus və ingilis dillərində buklet, kitab və digər nəşrlərlə tanış olmuş, AMEA-nın bir qrup alim və mütəxəssisi ilə görüşmüşlər.
Sonra Akademiyanın elmi müəssisə və təşkilatlarının rəhbərləri AMEA-nın uzun illər boyu əldə etdiyi uğurlar, önəmli araşdırmaların nəticələri, elm sahələrinin müxtəlif tipli problemləri ilə əlaqədar aparılan tədqiqatlar barədə uşaqlara məlumat vermiş, bir sıra mövzularda müzakirələr aparılmış, şagirdlərin sualları cavablandırılmışdır.
Məktəblilərin Azərbaycan Milli Elmlər Akademiyasının Elmi Nailiyyətlər Sərgisinə ekskursiyaları davam edir.