Bakı Şəhəri üzrə Təhsil İdarəsinin tabeliyində fəaliyyət göstərən 12 nömrəli İxtisaslaşdırılmış Olimpiya Ehtiyatları Uşaq Gənclər İdman Məktəbinin idmançıları Türkiyə Cümhuriyyətinin İstanbul şəhərində karate idman növü üzrə yeniyetmələr və uşaqlar arasında keçirilən Dünya Çempionatında iştirak ediblər. Yarışda ölkəmizi təlimatçı, məşqçi-müəllim Əbülfət Qarayevin rəhbərliyi ilə iki idmançı: 2007-ci il təvəllüdlü Murad Nemətli və 2003-cü il təvəllüdlü Hüseyn Məmmədli təmsil etmişlər.
Çempionatda Türkiyə, Gürcüstan, Rusiya, İran, Suriya, Misir, Ukrayna, İraq və Əlcəzair dövlətlərinin idmançıları da iştirak ediblər.
Yarışın nəticələrinə əsasən, Hüseyn Məmmədli öz çəki dərəcəsində 15 idmançı arasında qalib olaraq dünya birincisi olmuşdur.
Məmmədli Hüseyn birinci görüşündə Suriya idmançısına 8:0, ikinci görüşündə İran idmançısına 6:0 və final görüşündə Türkiyə idmançısına 7:0 hesabı ilə qalib gəlmişdir.
Məmmədli Hüseyn 2 ilə yaxındır ki, yığma komandanın üzvüdür. O, bir çox ölkədaxili və beynəlxalq turnirlərin mükafatçısı və qalibi olmuşdur. 17 aprel 2016-cı il tarixində Gürcüstanın Tbilisi şəhərində keçirilən beynəlxalq turnirin qalibi olan Hüseyn Məmmədli 157 nömrəli tam orta məktəbin VII sinfinin şagirdidir.