Ümumi

Biz çox şadıq ki, siz bu  vakansiya üzrə öz namizədliyinizi irəli sürmək qərarına gəlmisiniz.

Siz ümumi təhsil müəssisəsində rəhbər vəzifədə çalışmaq üçün təşəbbüs göstərirsiniz. Əminik ki, siz bu təşəbbüsün şəxsi və karyera inkişafı baxımından təqdirəlayiq olduğunu anladığınız kimi məsuliyyətli olduğunu da hiss edirsiniz.  

Bakı Şəhəri üzrə Təhsil İdarəsinin tabeliyində daxili mühiti və icma baxımından fərqlənən üç yüzdən artıq ümumi təhsil müəssisəsi fəaliyyət göstərir. Bu müəssisələrin hər birinin qarşısında duran ən ümdə vəzifə keyfiyyətli təhsil verməklə gələcəyin vətəndaşının yetişdirilməsi üçün münbit şərait yaratmaqdan ibarətdir.

Namizədə olan tələblər

Təsərrüfat işləri üzrə direktor müavini/təsərrüfat müdiri əsas funksional idarəedicilərdən biri olaraq müəssisənin təsərrüfat həyatını idarə edir, maliyyə-təsərrüfat sənədlərinə, maddi-texniki bazasının qorunmasına görə məsuliyyət daşıyır.

Təsərrüfat işləri üzrə direktor müavini/təsərrüfat müdiri öz fəaliyyətində Azərbaycan Respublikasının Konstitusiyasını, mövcud qanunvericilikdən irəli gələn sərəncam, əmr, təlimat, direktorun vəzifə səlahiyyətləri çərçivəsində göstəriş və  tapşırıqlarını əsas götürməlidir. Yəni təsərrüfat işləri üzrə direktor müavini/təsərrüfat müdiri bir tərəfdən təsərrüfat inventarlarının qorunub saxlanılmasını, binanın, kabinetlərin və sinif otaqlarının, ərazinin təmiz saxlanılmasını təmin etməli, kabinetlərdə və sinif otaqlarında, idman zalında, yeməkxanada sanitar-gigiyenik vəziyyəti nəzarətdə saxlamalı, binada cari təmir işlərinin aparılmasını, onun avadanlıqlarla, inventar və materiallarla təchiz olunmasını, yanğından mühafizə qaydalarına düzgün əməl olunmasını və istehsalat sanitariyasını təmin etməli, digər tərəfdən dəyişən şəraitdən asılı olaraq operativ qərarları qəbul edə bilməli və dünyanın aparıcı təhsil trendləri ilə ayaqlaşmağa hazır olmalıdır.

Müasir təhsil ocağının idarə edilməsi ilk növbədə fərqli xüsusiyyətlərə malik komanda üzvləri ilə çalışma və diqqətini daim ümumi məqsədlər üzərində cəmləmək kimi keyfiyyətlər tələb edir. Siz Bakı Şəhəri üzrə Təhsil İdarəsinin tabeliyində olan ümumi təhsil məktəbində rəhbər vəzifəyə gəlmə arzusunu ifadə etməklə paytaxta xas olan situasiya, fərqli mühit və insanlarla, habelə tez-tez dəyişən şəraitdə çalışmağa hazır olduğunuzu iddia etmiş olursunuz.

İş şəraiti

• Ümumi təhsil müəssisəsinin müəyyən edilmiş iş rejimi;
• Dəyişən dövrün tələblərinə xas olan idarəçilik proseslərində yaxından iştirak və bununla da inkişaf etmək imkanları;
• Özünü fərdi və komanda üzvü kimi ifadə etmək imkanları;
• Müəssisənin rəhbəri ilə birbaşa çalışmaq imkanı.

Namizəddən olan gözləntilər

• Texniki fəaliyyətini, müəssisənin təsərrüfat heyətinin işini analiz etmək;
• Texniki heyətin və müəssisənin maddi təchizatının planını hazırlamaq;
• Müəssisənin maddi-texniki bazasına sistemli olaraq nəzarət etmək;
• Müəssisənin qənaətbəxş səviyyədə səliqə-səhmanına və sanitar-gigiyenik normalara əməl edilməsinə nəzarət etmək;
• Müəssisənin inventarlarının qorunmasını təmin etmək;
• İstifadə müddəti bitmiş və ya yararsız hala düşmüş inventarların silinərək məktəbin inventar siyahısından çıxarılmasını təmin etmək;
• Müəssisə rəhbəri qarşısında yeni tədris vəsaitlərinin, inventarların alınması üçün məsələ qaldırılmasını və müvafiq təqdimatların verilməsini təşkil etmək;
• Təmiri mümkün olan inventarların təmir edilməsini təşkil etmək.

Tabelilik

Çalışdığı ümumi təhsil müəssisəsinin direktorunun birbaşa tabeliyindədir.

Kimlər tövsiyə olunur

1. Məktəbin maddi-texniki bazasına rəhbərlik edəcək və onu qoruyacaq qədər təcrübəyə malik olan namizədlər;
2. Təsərrüfat sahəsində müvafiq staja və təcrübəyə malik olan namizədlər;
3. Ümumi təhsil məktəblərində rəhbər vəzifənin məsuliyyətini öz üzərinə götürməyə hazır olan namizədlər.

Kimlərə tövsiyə olunmur

1. Rəhbər vəzifənin yalnız səlahiyyət mənbəyi hesab edən şəxslər;
2. Komanda şəklində deyil, fərdi idarəçiliyə meyl edən şəxslər;
3. Yetərli təcrübəyə malik olmayan şəxslər.

İmtahan prosesi

1.İmtahan prosesi iki - test və müsahibə mərhələsindən ibarətdir:

1.1.Test mərhələsi: Bu mərhələ vakansiya verilmiş vəzifə, İKT səriştələri və məntiq üzrə test suallarının cavablandırılmasından ibarət olacaq. Test 100 bal təşkil edən 40 sualdan ibarətdir. Vəzifə üzrə hər biri 3 bal olmaqla 20 sual, İKT səriştələri üzrə hər biri 2 bal olmaqla 10 sual və məntiq üzrə hər biri 2 bal  olmaqla 10 sualdan ibarətdir. Keçid həddi (ixtisas üzrə minimum 30 bal, İKT üzrə minimum 10 bal, məntiq üzrə minimum 10 bal olmaq şərtilə) 50 bala bərabərdir. 50 və 50 baldan yuxarı toplamış namizədlər müsahibə mərhələsinə dəvət ediləcəklər.

1.2.Müsahibə mərhələsində namizədə 5-15 dəqiqə ərzində ixtisas üzrə açıq və praktik suallar veriləcək.

1.3.Müsahibəni uğurla keçən namizədlər müsahibə nəticələrinə görə müvafiq vakant yerlərə yerləşdiriləcəklər. Uğurla keçib yerləşdirilməyən şəxslər isə ehtiyat kadr bazası siyahısına daxil ediləcəklər. Ehtiyat kadrlar bazasına daxil olan şəxslərin  vakant vəzifəyə yerləşdirilməsi iki il ərzində həyata keçirilə bilər.

2.İmtahan və müsahibəyə necə hazırlaşmaq olar?

2.1.Vəzifə üzrə: Məlumdur ki, rəhbər vəzifədə çalışmaq müxtəlif vəziyyətlərdə adekvat və operativ addımların atılmasını tələb edən bir məsuliyyətdir. Odur ki, ixtisas üzrə test sualları və müsahibə mərhələsinə hazır olmaq üçün dövlət təhsil standartları, əmək qanunvericiliyi, yetkinlik yaşına çatmayan uşaqlarla iş prinsipləri, pedaqogika, psixologiyanın əsasları, məktəbdaxili mühitin idarə olunması, Pedaqoji Şuranın fəaliyyəti, digər təlim və tədris istiqamətləri haqqında müvafiq məlumatlarla yaxından tanış olmaq tələb olunur.

2.2.Məntiq üzrə test suallarının cavablandırılması məntiqi təfəkkürü və analitik düşüncənin tətbiqini tələb edir.

2.3.İKT səriştələrinin ölçülməsinə dair test sualları praktiki xarakterli sual və  tapşırıqlardan ibarətdir.

Müsahibədə iştirak edən namizədlərə uğurlar arzulayırıq!

Qeydiyyat

İmtahanda iştirak etmək üçün qeydiyyat linki