Bakı şəhəri 49 nömrəli tam orta məktəbdə 9-11-ci sinif şagirdləri üçün Bakı şəhəri üzrə Təhsil İdarəsi və “Yayım” Assosiasiyasının birgə təşəbbüsü ilə “Ermənistan-Azərbaycan, Dağlıq Qarabağ problemi:hadisə şahidlərinin iştirakı ilə gənclərdə vətənpərvərlik ruhunun təbliği sahəsində tədbirlərin təşkili” layihəsi keçirilmişdir. Tədbirdə 91 və163 nömrəli tam orta məktəblərin şagirdləri də iştirak etmişdir. Layihənin məqsədi gənc nəsildə Qarabağ problemini bu proseslərdə iştirak edən insanların - Qarabağ veteranlarının dilindən eşitdirməklə, məktəblilərdə vətənə, torpağa məhəbbət aşılamaq, mənəvi dəyərlərimizi qorumaqdır.
Tədbirdə “İşğal altında qalan maddi və mənəvi sərvətlərimiz”, “Gənclər Qarabağ haqqında nə bilirlər”, “Şəhid həmyerlilərimiz haqqında nə bilirik”, “İşğal altında olan rayonlarımız haqqında bildiklərimiz”, “İgid Azərbaycan əskəri olmağa hazır olaq”, “İşğal altında olan Azərbaycan rayonları və bir milyona yaxın qaçqınlarımız”, “Ermənilər, tarixi xəyanətlər və ermənilərin məqsədli təcavüzü”, “Girovluqda olan azərbaycanlıların çəkdiyi məşəqqətlər”, “İgid Azərbaycan oğulları haqqında”, “Sabahın əskəri olmağa hazırsanmı” mövzularında məktəblilərlə dialoq-sorğu aparılmış, onlarda Qarabağ probleminin yaranma səbəbləri, işğal altında olan rayonlarımızın coğrafi əhəmiyyəti, flora və faunası haqqında təsəvvür yaradılmış, torpaqlarımızın ermənilər tərəfindən zəbt edilməsinin maddi və mənəvi yükü izah edilmişdir.
Tədbir iştirakçılarına Qarabağdan, qəhrəmanlarımızdan bəhs edən kitablar, bukletlər paylanmış, məktəb kitabxanasına 11 adda kitab hədiyyə edilmişdir.