Bakı şəhəri 186 nömrəli tam orta məktəbdə “Fövqəladə hallarda özünü necə aparmalı” mövzusunda maarifləndirici tədbir keçirilmişdir.Tədbirin keçirilməsində məqsəd fövqəladə hallara hazırlıq səviyyəsinin yoxlanılması, məktəb kollektivinin fövqəladə hadisələrdən mühafizə üsulları və bu cür hallarda hərəkət qaydaları ilə bağlı bilik və bacarıqlarını təkmilləşdirməkdən ibarət olmuşdur.
Tədbirin təşkilatçıları və dəvət olunan qonaqlar məktəblilər və məktəbin pedaqoji kollektivi arasında maarifləndirmə işi aparmış, “Fövqəladə halların təsnifatı”, “Kollektiv mühafizə qurğuları”, “Təbii fövqəladə hallar zamanı nə etməli?”, “Yanğın-partlayış və nəqliyyat qəzası zamanı nə etməli”, “Radiasiya, kimya və bioloji xarakterli fövqəladə hallar zamanı nə etməli”, “Terror xarakterli fövqəladə hallar zamanı nə etməli” mövzularında çıxış etmişlər.Tədbirin nəzəri hissəsində məktəblilərin ifasında fövqəladə hallardan bəhs edən şeirlər səslənmiş, videosujetlər göstərilmişdir.
Tədbirin praktiki hissəsində bütün məktəb kollektivi və qonaqlar məktəb daxilindən təxliyə edilmiş, Fövqəladə Hallar Nazirliyinin əməkdaşları tərəfindən nümayiş etdirilən əyani vəsaitlərlə tanış olmuş, canlı olaraq Dövlət Yanğın Nəzarəti Xidmətinin, Bakı Regional Mərkəzinin Xüsusi Xilasetmə Xidmətinin, FHN Tibb Xidmətinin və Bakı şəhər Təcili Təxirəsalınmaz Tibbi Yardım Stansiyasının əməkdaşları tərəfindən fövqəladə hallarda göstərdikləri əməliyyatlar və digər qaydalar nümayiş olunmuşdur.