Bakı şəhəri üzrə Təhsil İdarəsinin 14 oktyabr 2015-ci il tarixli 243 nömrəli əmrinə əsasən, noyabrın 27-də Bakı şəhəri 258 nömrəli məktəbdə şəhərin ümumtəhsil məktəblərinin VIII-XI sinif şagirdləri arasında “Ümumdünya Uşaq Hüquqları günü”nə həsr olunmuş “Hüquqlarımızı tanıyaq və qoruyaq!” mövzusunda inşa yazı müsabiqəsinin şəhər mərhələsi keçirilib.
1-5 noyabr tarixlərində məktəblilərin öz hüquq və vəzifələri barədə biliklərinin artırılması, onların öz hüquqlarını tanıması məqsədilə təşkil edilən müsabiqənin məktəbdaxili mərhələsində qalib gələn şagirdlər II-şəhər mərhələsində iştirak etmək hüququ qazanıblar.
Bakı şəhəri 258 nömrəli tam orta məktəbdə keçirilən müsabiqənin şəhər mərhələsində ümumilikdə 250 şagird iştirak edib.
Məktəblilər müsabiqəyə yaradıcı yanaşıb, onlara verilən vaxt ərzində Ümumdünya Uşaq Hüquqları Gününün əhəmiyyətini, ölkəmizdə uşaq hüquqlarının müdafiəsinə və uşaqların əmin-amanlığının təmin olunmasına yönəldilmiş tədbirləri, “Uşaq hüquqları haqqında” Azərbaycan Respublikasının Qanunu və digər qanunvericilik aktlarını, mühüm beynəlxalq sənədlərdən olan Uşaq Hüquqları Konvensiyasının müddəalarını və öz hüquqlarını inşa yazılarında sərbəst şəkildə ifadə ediblər.