Xətai rayonu 171 nömrəli tam orta məktəbdə dekabrın 24 – də “Milli - mənəvi dəyərlərimiz və qloballaşma şəraitində onların mühafizəsi, inkişafı” mövzusunda tədbir keçirilib. Tədbirin keçrilməsində əsas məqsəd milli - mənəvi dəyərlərimizin təbliği, onları böyüməkdə olan gənc nəslə sevdirmək və şagirdlər tərəfindən onların qorunması və inkişafı üçün yollar axtarmaq olub.
Tədbirdən əvvəl qonaqlar milli - mənəvi dəyərlərimizdən bəhs edən sərgiyə baxış keçiriblər. Tədbirdə çıxış edən Bakı Şəhəri üzrə Təhsil İdarəsinin müdir müavini Hüseyn Əsgərov Azərbaycan Respublikasının Prezidenti cənab İlham Əliyevin 148 nömrəli məktəbin açılış mərasimindəki nitqində səslənən məktəblərdə təhsilin keyfiyyətinin yüksəldilməsi, milli - mənəvi dəyərlərimizin təbliği, şagirdlərdə vətənpərvərlik ruhunun aşılanması müddəaları barədə danışıb.
Sonra şagirdlər milli adət və ənənələrimiz, milli abidələrimiz, muğam və xalq mahnıları, milli xalçalarımız, milli geyimlərimiz və milli mətbəximiz barədə müzakirələr aparıb. Tədbirdə qloballaşmanın mahiyyəti və qloballaşma şəraitində milli-mənəvi dəyərlərimizin mühafizəsi və inkişafı sahəsində Heydər Əliyev Fondunun Prezidenti Mehriban xanım Əliyevanın gördüyü işlər, həmçinin şagirdlərin internet vasitəsi ilə milli-mənəvi dəyərlərimizin təbligi və mühafizəsi istiqamətində apardığı işlər barədə məlumatlar verilib.