Bakı şəhər məktəbləri arasında keçirilən “Şahin” hərbi-idman oyununun Bakı üzrə zona birinciliyinə start verilmişdir. “Şahin” hərbi-idman oyununun keçirilməsində məqsəd gənc nəslin hərbi vətənpərvərlik tərbiyəsinə diqqət və qayğını daha da artırmaq, məktəb şagirdlərini hərbi idman oyunlarına cəlb etməklə onların ordu sıralarında xidmətə hazırlanmasına köməklik göstərməkdir. Yarışda “Şahin” hərbi-idman oyununun Bakı şəhər zona birinciliyində 23, 31, 32, 50, 72, 92, 100, 110, 112, 138, 280 nömrəli tam orta məktəblərin komandaları ilə yanaşı, Zəngilan, Şuşa və Laçın rayon komandaları da iştirak etmişdir.
Gənclərdə vətənpərvərlik tərbiyəsi və vətəndaşlıq mövqeyinin formalaşması, ümumtəhsil müəssisələrində çağırışaqədərki hərbi hazırlıq fənninin tədrisinin təkmilləşdirilməsi, hərbi-idman oyunlarının keyfiyyəti və kütləviliyinin artırılması, gələcək nəslə milli-mənəvi dəyərlərin aşılanması, Azərbaycan hərb salnaməsinin öyrədilməsi istiqamətində mübarizlik, qəhrəmanlıq, dözümlülük prinsiplərini özündə əks etdirən “Şahin” hərbi idman oyununda 14 komanda iştirak etmişdir. Yarış 7 mərhələ üzrə keçirilmişdir. Yarışın nəticələrinə görə, 138 nömrəli tam orta məktəbin komandası I, 31 nömrəli tam orta məktəbin komandası II, 23 nömrəli tam orta məktəbin komandası III yerə layiq görülmüşdür.
Komandalar Bakı Şəhəri Gənclər və İdman Baş İdarəsi tərəfindən Fəxri fərman və qiymətli hədiyyələrlə mükafatlandırılmışlar.