Bakı Şəhəri üzrə Təhsil İdarəsinin təşkilatçılığı ilə 7 nömrəli tam orta məktəbdə 25 may 2016-cı il tarixində “28 May-Respublika Günü”nə həsr olunmuş rayon miqyaslı elmi-praktik konfrans keçirilmişdir.
“Azadlıq və istiqlaliyyət hər bir xalqın milli sərvətidir” adlı elmi-praktik konfransda Səbail Rayon İcra Hakimiyyətinin başçısı Eldar Əzizov, Yeni Azərbaycan Partiyasının Səbail rayon təşkilatının sədri, Milli Məclisin deputatı Şəmsəddin Hacıyev, Səbail rayon ümumtəhsil məktəblərinin direktorları, valideynlər iştirak etmişlər.
Qonaqlar məktəbin foyesində yaradılmış Azərbaycan tarixini canlandıran sərgi ilə tanış olmuşlar. Sərgidə Azərbaycan xalqının zəngin mədəniyyətini və tarixini özündə əks etdirən sənət nümunələri, əl işləri nümayiş olunmuşdur.
Daha sonra tədbir “Tariximiz dünən və bu gün” başlığı altında şagird araşdırmasının təqdimatı ilə davam etmişdir. Məktəblilər təqdimatın hazırlanması zamanı araşdırmalar aparmış, ölkəmizin tarixi haqqında yazılmış kitab və məqalələrlə tanış olmuş, Azərbaycanın bütün tarixi dövrləri haqqında məlumatlar toplamışlar.
Təqdimatda Azərbaycan Xalq Cümhuriyyətinin yaranma tarixi və onun Şərqin ilk demokratik respublikası olaraq dünya dövlətçilik tarixinə verdiyi töhfələrindən, habelə ölkəmizdə müasir dövlət quruculuğu yolunda Ümummilli Lider Heydər Əliyevin Azərbaycan xalqına göstərdiyi tarixi xidmətlərindən bəhs edilmişdir.
Tədbirdə “Azərbaycan dövlət müstəqilliyinin bərpa edilməsi XX əsrdə xalqımızın ən böyük nailiyyətidir”, “Azərbaycanda hüquqi və demokratik dövlət quruculuğunun həyata keçirilməsi”, “Xarici ölkələrdə Azərbaycan diasporalarının yaradılması”, “Azərbaycan Respublikasının Prezidenti cənab İlham Əliyev Ulu Öndərin layiqli davamçısıdır” mövzularında çıxışlar dinlənilmişdir.
Sonda iştirakçılara “İstiqlaliyyətimiz əbədidir” mövzusunda video təqdim olunmuşdur.