Bakı Şəhəri üzrə Təhsil İdarəsinin təşkilatçılığı ilə 54 nömrəli tam orta məktəbdə 24 may 2016-cı il tarixində “28 May-Respublika Günü”nə həsr olunmuş rayon miqyaslı tədbir keçirilib.
Tədbirdə Bakı Şəhəri üzrə Təhsil İdarəsinin Metodiki Mərkəzinin müdiri Vahid Qurbanov, Nəsimi-Binəqədi Xidmət bölməsinin müdiri Aydın Qarayev, İdarənin Ümumi təhsil sektorunun böyük məsləhətçisi Böyükağa Əhmədov, Nəsimi Rayon İcra Hakimiyyətinin başçısı Asif Əsgərov, müavini Gülarə Verdiyeva, icra nümayəndələri, Nəsimi rayon ümumtəhsil məktəblərinin direktorları və uşaq birliyi rəhbərləri iştirak etmişlər.
Əvvəlcə qonaqlar məktəbdə yaradılmış sərgi ilə tanış oldular. Sərgi üç bölmədən təşkil olunmuşdur. Birinci bölmədə Azərbaycanın tarixi keçmişini əks etdirən nümunələr, ikinci bölmədə məktəblilərin “28 May-Respublika Günü”nə həsr etdikləri rəsmlər sərgilənmişdir. Üçüncü bölmədə isə “Müasir Azərbaycan” mövzusunda yaradıcılıq işləri nümayiş olunmuşdur.
Tədbir zamanı şagirdlər canlı olaraq rəsmlər çəkmiş, məktəbin və şagirdlərin nailiyyətlərini əks etdirən diplomlar, sertifikatlar qonaqlara göstərilmişdir.
Daha sonra şagirdlər ədəbi-bədii kompozisiya ilə çıxış etmişlər. Şagirdlər “Çiçəklənən Azərbaycan” mövzusunda şeirlər, mahnılar, rəqs nömrələri ifa etmiş, “Kitabi-Dədə Qorqud” dastanı, “Gülüstan” poemasından səhnəciklər göstərmişlər.
Azərbaycan Xalq Cümhuriyyətinin tariximizin ən şərəfli səhifələrindən biri olduğunu diqqətə çatdıran qonaqlar müstəqil dövlətimizin memarı və qurucusu, ulu öndər Heydər Əliyevin siyasi xəttinin layiqli davamçısı Prezident İlham Əliyevin rəhbərliyi ilə respublikamızın bu gün inamla irəlilədiyini, dinamik inkişaf etdiyini, regionda və dünyada lider dövlətə çevrildiyini, Azərbaycanın möhkəm dövlətçilik ənənələri qazanmış, müstəqilliyinə qətiyyətlə bağlı və eyni zamanda müxtəlif sahələrdə böyük yaradıcılıq nümayiş etdirən bir ölkə olduğunu vurğulamışlar.
Bakı Şəhəri üzrə Təhsil İdarəsinin təşkilatçılığı ilə mövzu ilə əlaqədar tədbirlərin təşkili davam edir.