Bakı Şəhəri üzrə Təhsil İdarəsi və “Əsgər Ailələrinə Dəstək” İctimai Birliyinin birgə təşkilatçılığı ilə 2016-cı ilin may-iyun aylarında təhsil müəssisələrində həyata keçirilən “Vətənpərvərliyin təbliğində ictimai dəstəyin artırılması” layihəsinə yekun vurulmuşdur.
Layihə çərçivəsində gənc nəsildə vətənpərvərlik ruhunun yüksəldilməsi, gənclərimizdə müstəqil dövlətçilik ənənələrinə hörmət və sədaqət hissinin gücləndirilməsi, qəhrəmanlıq nümunələrinin onlar arasında təbliği, Azərbaycanın milli-mədəni irsi və tarixi haqqında geniş məlumat verilməsi istiqamətində bir sıra tədbirlər həyata keçirilmişdir. İctimai Birlik və Bakı Şəhəri üzrə Təhsil İdarəsinin əməkdaşlarının iştirakı ilə Quba və Mingəçevir şəhərlərində Qarabağ müharibəsi əlilləri, veteranları, şəhid ailələri, Böyük Vətən Müharibəsi veteranları ilə görüşlər keçirilmiş, mövzu ilə əlaqədar söhbətlər aparılmış, filmlər nümayiş etdirilmişdir.
Layihənin başa çatması ilə əlaqədar 02 sentyabr 2016-cı il tarixində Bakı Beynəlxalq Mətbuat Mərkəzində təşkil olunan yekun tədbirdə 3, 102, 135, 157, 248 nömrəli və digər ümumtəhsil məktəblərinin pedaqoji işçiləri, Bakı Şəhəri üzrə Təhsil İdarəsi, “Əsgər Ailələrinə Dəstək” İctimai Birliyi, şəhid ailələri, Qarabağ müharibəsi veteranları və müxtəlif qeyri-hökumət təşkilatlarının və KİV-lərin nümayəndələri iştirak etmişlər.
Layihəyə dəstək olmuş təşkilatlar, o cümlədən Bakı Şəhəri üzrə Təhsil İdarəsi fəal iştirakına görə İctimai Birlik tərəfindən “Təşəkkürnamə” ilə təltif olunmuşdur.
Bakı Şəhəri üzrə Təhsil İdarəsinin Gənclərin Çağırışaqədərki Hazırlığı üzrə metodisti Mürsəl Qurbanov, “Demokratik Cəmiyyət və Qadın Hüquqlarının Müdafiəsi” İctimai Birliyinin sədri Mehriban Abdullayeva və başqaları tədbirdə çıxış edərək “Əsgər Ailələrinə Dəstək” İctimai Birliyinin layihə çərçivəsində apardığı işləri yüksək qiymətləndirmiş və gələcəkdə də belə layihələrin təhsil müəssisələrində yer alacağına ümidvar olduqlarını bildirmişlər.
Sonda İctimai Birliyin sədri Mətanət Əsgərqızı layihədə yaxından iştirak etmiş bütün təşkilatlara öz minnətdarlığını bildirmişdir.