Sual: Məktəbəhazırlıq qruplarında tədris ilinin təşkili necə müəyyənləşdirilib və tətillər olacaqmı?

Cavab: Məktəbəhazırlıq qruplarında dərs ili iki yarımilə bölünəcək: - I yarımil: 1 oktyabr-26 yanvar; - II yarımil: 1 fevral-31 may. Dərs ili ərzində aşağıdakı tətillər müəyyən olunub: - 5 gün payız tətili (16-20 noyabr); - 5 gün qış tətili (27-31 yanvar); - 5 gün əlavə tətil (1-5 may).

Sual: Məktəbəhazırlıq qruplarında uşaqlara qiymət yazılacaqmı?

Cavab: Məktəbəhazırlıq qruplarında məşğələlərə davamiyyət və tədris olunan mövzu müvafiq sinif jurnalında qeyd ediləcək, uşaqların təlim nailiyyətləri şifahi formada qiymətləndiriləcək və bu barədə valideynlərə məlumat veriləcək.

Sual: Məktəbəhazırlıq qruplarında təhsil alan uşaqlara ev tapşırıqları veriləcəkmi?

Cavab: Məktəbəhazırlıq qruplarında təhsil alan uşaqlar üçün ev tapşırıqları nəzərdə tutulmur.

Sual: Bir məşğələnin müddəti neçə dəqiqə müəyyən olunub?

Cavab: Bir məşğələnin müddəti 30 dəqiqə, məşğələlərarası fasilə 10 dəqiqə müəyyən edilib.

Sual: Məktəbəhazırlıq məşğələləri gündə neçə saat olacaq?

Cavab: Məktəbəhazırlıq qruplarında bir gün ərzində 3 (üç) məşğələ tədris olunacaq.

Sual: Məktəbəhazırlıq məşğələləri həftədə neçə gün olacaq?

Cavab: Məktəbəhazırlıq məşğələləri həftədə 4 (dörd) gün keçiləcək.

Sual: Bir məktəbəhazırlıq qrupunda neçə uşaq olacaq?

Cavab: Məktəbəhazırlıq qruplarında uşaqların sıxlığı aşağıdakı kimi müəyyənləşdiriləcək: - qəsəbə və kəndlərdə yerləşən ümumtəhsil məktəbləri üçün - ən azı 10 uşaq; - şəhərlərdə yerləşən ümumtəhsil məktəbləri üçün - ən azı 15 uşaq. - Dövlət ümumtəhsil məktəblərində yaradılan məktəbəhazırlıq qrupunda uşaqların sayının 30 nəfərdən artıq olmasına yol verilmir.

Sual: Məktəbəhazırlıq qruplarında hansı dərs məşğələləri tədris olunacaq?

Cavab: Məktəbəhazırlıq qruplarında Ətraf aləmlə tanışlıq, Savad təliminə hazırlıq və nitq inkişafı, Bədii təfəkkürün inkişafı, Məntiqi və riyazi təfəkkürün inkişafı, Təsviri fəaliyyət, Musiqi və Fiziki mədəniyyət dərs məşğələləri tədris ediləcək.

Sual: Məktəbəhazırlıq qruplarında həftədə neçə saat dərs keçiriləcək?

Cavab: Məktəbəhazırlıq qruplarının 2016-2017-ci dərs ilinə aid tədris (məşğələ) planına əsasən, məktəbəhazırlıq məşğələlərində həftədə 12 saat tədris aparılması nəzərdə tutulub.

Sual: Məktəbəhazırlıq qruplarında ümumilikdə neçə müəllim dərs deyəcək?

Cavab: Məktəbəhazırlıq qruplarında dərs deyəcək müəllimlərin sayı qrupların sayına müvafiq olaraq müəyyən ediləcək.

Sual: Məktəbəhazırlıq qruplarında hansı müəllimlər dərs deyəcək?

Cavab: Məktəbəhazırlıq qruplarında məşğələlər yalnız ibtidai sinif müəllimi ixtisaslı və müəyyən iş təcrübəsinə malik müəllim tərəfindən aparılacaq.

Sual: Məktəbəhazırlıq qruplarına neçə yaşlı uşaqlar cəlb ediləcək?

Cavab: Azərbaycan Respublikası Nazirlər Kabinetinin 2016-cı il 11 iyul tarixli 272 nömrəli qərarına əsasən, dövlət ümumi təhsil məktəblərində yaradılmış məktəbəhazırlıq qruplarına 5 yaşı həmin il tamam olmuş uşaqlar qəbul olunurlar. Bununla belə, valideynlərin çoxsaylı müraciətlərini nəzərə alaraq, yaradılmış qrupların sayını artırmamaq şərti ilə uşaq sayı norması imkan verdiyi halda, 2010-cu ildə anadan olmuş, lakin məktəb yaşına çatmamış uşaqların da valideyninin arzusuna görə, məktəbəhazırlıq qruplarına cəlbi yerli təhsili idarəetmə orqanlarına tövsiyə edilib.

Sual: Məktəbəhazırlıq qrupları bütün şəhər və rayonlarda fəaliyyət göstərəcək?

Cavab: Məktəbəhazırlıq qrupları ölkənin bütün şəhər və rayonlarında fəaliyyət göstərəcək.

Sual: Məktəbəhazırlıq qruplarında məşğələlər ödənişli olacaq?

Cavab: Məktəbəhazırlıq qruplarında təhsil dövlət hesabına aparılacaq.

Sual: Təhsil Nazirliyinin birbaşa tabeliyindəki lisey, gimnaziyalarda və Bakı Şəhəri üzrə Təhsil İdarəsinin tabeliyindəki ümumtəhsil məktəblərində I sinfə elektron sənəd qəbulu necə həyata keçirilir?

Cavab: Təhsil Nazirliyinin birbaşa tabeliyindəki lisey, gimnaziyalarda və Bakı Şəhəri üzrə Təhsil İdarəsinin tabeliyindəki ümumtəhsil məktəblərində I sinfə şagird qəbulu elektron sistem vasitəsilə aparılır. Sənəd qəbulu www.mektebeqebul.edu.az elektron sistemi vasitəsilə həyata keçirilir.

Sual: I sinfə şagird qəbulu hansı müddətlərdə həyata keçirilir?

Cavab: Ərizələrin onlayn qeydiyyatı 2017-ci il martın 15-dən başlayır və 2017-ci il sentyabrın 15-də başa çatır. 14 iyun 2017-ci il tarixədək elektron qeydiyyata alınan ərizələr üzrə sənədlər vaxtında məktəbə təqdim olunmadığı halda, həmin ərizə sistemdən silinir və təkrar qeydiyyat imkanı yaradılır. 15 iyun 2017-ci ildən sonra elektron ərizəsi qeydiyyata alınan şəxslər üçün sənədlərin məktəbə təqdim olunma müddəti son olaraq 18 sentyabr 2017-ci ildə başa çatır.

Sual: I sinfə şagird qəbulu üçün hansı sənədlərin təqdim edilməsi tələb olunur?

Cavab: Valideyn (qanuni nümayəndə) I sinfə şagird qəbulu üçün aşağıdakı sənədləri təqdim etməlidir:
1. Valideynin və uşağın şəxsiyyətini təsdiq edən sənədin əsli və surəti (uşağın şəxsiyyət vəsiqəsi olmadığı halda doğum haqqında şəhadətnaməsi; Azərbaycan Respublikasının ərazisində müvəqqəti və ya daimi yaşamaq üçün icazə vəsiqəsi; Birləşmiş Millətlər Təşkilatının Qaçqınların İşləri üzrə Ali Komissarlığının Himayə Sənədi; xarici ölkələrdə verilmiş doğum haqqında şəhadətnamə (Azərbaycan dilinə tərcümə olunmuş variantda)); 2.  uşağın sağlamlığı haqqında tibbi arayış (forma 26U); 3. 2 (iki) ədəd 3x4 ölçüdə rəngli fotoşəkil; 4. məktəbəhazırlıq qrupunu bitirməsi haqqında arayış (əgər məktəbəhazırlıq qrupunda təhsil alırsa); 5.  valideynin (qanuni nümayəndənin) “Şəxsi kabinet”indən çap olunmuş “Ərizə”.

Sual: Elektron sistem hansı zərurətdən tətbiq edilir?

Cavab: I sinfə elektron sənəd qəbulunun tətbiqi “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” Azərbaycan Respublikası Prezidentinin 23 may 2011-ci il tarixli Fərmanının tələblərinin həyata keçirilməsini təmin etmək üçün təhsil sahəsində əhaliyə göstərilən elektron xidmətlərin dairəsinin genişləndirilməsi, şagird kontingentinin uçot sisteminin təkmilləşdirilməsi məqsədilə tətbiq edilir. I sinfə şagird qəbulu üzrə müraciətlərin elektron qeydiyyat sistemi bu prosesin sadələşdirilməsinə xidmət edir.

Sual: Elektron ərizənin qeydiyyatı kim tərəfindən aparıla bilər?

Cavab: Qeydiyyat valideyn (qanuni nümayəndə) tərəfindən onlayn (www.mektebeqebul.edu.az) və ya Bakı şəhərinin hər inzibati rayonunda I sinfə elektron sistem vasitəsilə ərizələrin qeydiyyatı məsələlərində vətəndaşlara kömək göstərilməsi məqsədilə müəyyənləşdirilmiş 50 məktəbdə fəaliyyət göstərən Alternativ Qeydiyyat Mərkəzləri tərəfindən aparıla bilər.

Sual: Alternativ Qeydiyyat Mərkəzləri harada təşkil olunacaq?

Cavab: I sinfə elektron sistem vasitəsilə ərizələrin qeydiyyatı məsələlərində vətəndaşlara kömək göstərilməsi məqsədilə Səbail rayonu üzrə 7, 163 və 236 nömrəli, Nizami rayonu üzrə 129, 145, 214 və 227 nömrəli, Nəsimi rayonu üzrə 19, 164, 240 və 247 nömrəli, Yasamal rayonu üzrə 18, 21 və 286 nömrəli, Nərimanov rayonu üzrə 36, 57, 82 və 177 nömrəli, Xətai rayonu üzrə 24, 116, 165, 191 və 261 nömrəli, Sabunçu rayonu üzrə 4, 74, 75, 78, 128, 130 və 170 nömrəli, Suraxanı rayonu üzrə 84, 270, 279, 315 və 318 nömrəli, Qaradağ rayonu üzrə 110, 180, 195, 228, 274 və 288 nömrəli, Xəzər rayonu üzrə 117, 156, 181, 234 və 241 nömrəli, Pirallahı rayonu üzrə 235 nömrəli, Binəqədi rayonu üzrə 3, 179, 297 və 313 nömrəli tam orta məktəblərdə ərizə qəbulu üzrə alternativ qeydiyyat mərkəzləri yaradılacaq.

Sual: Elektron sistemdən istifadə ödənişlidirmi?

Cavab: Xeyr, elektron sənəd qəbulu sistemindən istifadə üçün valideynlərdən (qanuni nümayəndələrdən) heç bir ödəniş tələb olunmur.

Sual: Elektron sistemdə qeydiyyat zamanı istifadəçi hansı əlaqə vasitələrindən istifadə edir?

Cavab: Mobil telefon və ya elektron poçt ünvanı.

Sual: Məktəblərin seçimi hansı qaydada aparılır?

Cavab: Valideyn (qanuni nümayəndə) elektron sistemdə seçdiyi məktəbə sorğu yerləşdirməlidir.

Sual: Eyni zamanda bir neçə məktəb seçmək mümkündürmü?

Cavab: Xeyr. Valideynə yalnız bir məktəb seçib, sorğu yerləşdirmək imkanı yaradılır.

Sual: Valideyn məktəb seçdikdən sonra fikrini (seçimini) dəyişə bilərmi?

Cavab: Bəli. Bunun üçün o, sistemə əvvəl yerləşdirdiyi sorğunu ləğv etməli, sonra yeni məktəb seçməlidir.

Sual: Xarici ölkə vətəndaşının elektron ərizəsinin qeydiyyatı necə aparılır?

Cavab: Azərbaycan Respublikasının ərazisində müvəqqəti və ya daimi yaşamaq üçün Dövlət Miqrasiya Xidmətindən aldığı icazə vəsiqəsi və xarici ölkənin doğum haqqında şəhadətnaməsi əsasında.

Sual: 6 yaşı tamam olmayan uşaqların qeydiyyatı hansı müddətlərdə aparılır?

Cavab: 6 yaşı sentyabrın 16-dan dekabrın 31-dək tamam olan xüsusi istedadı ilə fərqlənən uşaqların valideynlərinin (qanuni nümayəndələrinin) elektron ərizələrinin qeydiyyatı Təhsil Nazirliyinin birbaşa tabeliyində olan müəssisələrə, lisey və gimnaziyalara martın 15-dən mayın 31-dək, ümumtəhsil məktəblərinə isə martın 15-dən iyunun 20-dək aparılacaqdır.

Sual: 6 yaşı tamam olmayan uşaqların məktəbə qəbulu hansı qaydada aparılır?

Cavab: Bakı Şəhər üzrə Təhsil İdarəsi tərəfindən yaradılmış Müsabiqə Komissiyası tərəfindən “Xüsusi istedada malik uşaqların vaxtından əvvəl I sinfə qəbulu Qaydaları”na əsasən, iyun-iyul ayları ərzində aparılacaqdır.

Sual: 6 yaşı tamam olmayan uşaqlar hansı hallarda I sinfə müsabiqədənkənar qəbul edilə bilər?

Cavab: Təhsil Nazirliyinin birbaşa tabeliyində olan təhsil müəssisələrinə, lisey və gimnaziyalara müsabiqədə iştirak edib uğur qazananlar və dövlət ümumi təhsil müəssisələrində dövlət hesabına məktəbəhazırlıq qrupunu bitirmiş uşaqlar I sinfə müsabiqədənkənar qəbul oluna bilər.

Sual: 6 yaşı tamam olmayan uşaq Müsabiqə Komissiyasında müsahibədən keçməzsə, valideynlər hara və nə zaman müraciət edə bilərlər?

Cavab: 6 yaşı tamam olmayan uşaq Müsabiqə Komissiyasında müsahibədən keçməzsə, valideynlər Bakı Şəhəri üzrə Təhsil İdarəsi tərəfindən təşkil edilən Apelyasiya komissiyalarına 15 iyul-10 avqust tarixlərində müraciət edə bilərlər.